2026ko Zerga Neurriei buruzko Foru Arau berriak aldaketak dakartza enpresen transmisioaren zerga-tratamenduan, enpresa-jardueraren jarraitutasuna bermatzeko. Horrez gain, langileen zerga-tratamendua hobetzen du, langile kualifikatuen erakarpena indartzen du eta pertsonen ongizate fisiko eta mentala sustatzen du.

Ekimenak hainbat erronkari erantzuten die: enpresetako belaunaldien arteko erreleboa, profesionalen arteko lehia, enpresen eta langileen arteko lotura sendotzea eta gizarte-kohesioa indartzeko beharra funtsezko alderdietan, hala nola etxebizitzan, pertsonak eta enpresak lurraldearen garapenaren erdigunean jarriz. Horrela, Bizkaiak urrats berri bat ematen du, epe labur eta ertainean, ekonomia eta gizartea indartzeko estrategian.

Bizkaiko Ahaldun Nagusi Elixabete Etxanobek bere hitzaldian azpimarratu duenez, Foru Arauaren Aurreproiektu hau Ekonomia Itunak fiskalitatea Bizkaiko erronka ekonomiko eta sozialen zerbitzura erabiltzeko duen gaitasunaren barruan kokatzen da.

Azken urteetan bultzatutako erreformei jarraipena ematen die eta, aldi berean, enpresa-errotzea indartzera, profesionalak erakartzera eta atxikitzera eta etxebizitzarako sarbidea erraztera bideratuta dago. Neurri horien helburua lurraldearen lehiakortasuna hobetzea, jarduera ekonomikoaren jarraitutasuna bultzatzea eta gizarte-kohesioa indartzea da.

Enpresa-errotzea eta langileen konpromisoa bultzatzea

Estrategiak enpresen eta Bizkaiaren arteko lotura sendotzea du helburu, enpresa-proiektuek lurraldean erabakitze-, inbertsio- eta enplegu-guneak mantentzea ahalbidetuz. Horretarako, enpresen transmisioa eta jarraitutasuna bideratzen duten mekanismoak indartzen dira, batez ere belaunaldien arteko errelebo-prozesuetan, jarduera ekonomikoa eta enplegua babesteko neurrien bidez.

Berrikuntzen artean nabarmentzen da zenbait enpresa-transmisiotan sortutako gainbalioak % 30 murrizten direla, enpresa-jardueraren eta enpleguaren jarraitutasuna bermatzen bada.

Era berean, plantillek enpresa-proiektuetan parte-hartze handiagoa izatea bultzatzen duten formulak sustatzen dira, konpainien etorkizunarekiko eta lurraldearen garapenarekiko konpromisoa indartuz.

Ildo horretatik, enpresen eta langileen arteko lotura sendotzeko neurriak txertatzen dira, erakundeen iraunkortasunerako, produktibitaterako eta kapitalean parte hartzeko pizgarrien bidez.

Horien artean dago enpresaren akzioak edo partaidetzak jasotzeko aukera, urtean 12.000 eurorainoko zerga-abantailekin langile bakoitzeko, bai eta baldintza egokietan maileguak eskuratzeko aukera ere, kooperatiba bateko bazkide gisa sartzeko edo enpresan partaidetza eskuratzeko.

Estrategiak, gainera, genero-ikuspegia txertatzen du lanean sustraitzeko neurri berri batzuetan. Horrez gain, emakumezko langileen produktibitateari lotutako pizgarriak indartzea aurreikusten da, emakumeen talentuaren garapena bultzatzera eta Bizkaiko enpresa-ehunaren barruan erantzukizun-postuetan emakumeen presentzia handitzera bideratutako ekimena.

Profesionalak erakartzea, atxikitzea eta fidelizatzea

Bizkaiak aurrera egiten du talentua lortzeko lehia globalean, enpresa-ehunari balioa emango dioten langile kualifikatuak erakartzeko PFEZn indarrean dagoen zerga-araubidea zabalduz eta hobetuz, pertsona horiek lurraldean ezartzea erraztuz eta inpatriatuei eskatzen zaizkien baldintzak sinplifikatuz.

Horien artean nabarmentzen da lanbide-jardueratik eratorritako etekinen gaineko salbuespena % 50era igotzen dela, eta ehuneko hori % 60ra igotzen dela 36 urtetik beherakoentzat.

Halaber, gastu kengarri berri bat gehitzen da, lan-arrazoiengatiko mugigarritasun geografikoa konpentsatzeko; kengarria urtean 2.000 eurokoa izango da lekualdatzearen urtean eta hurrengo hiru urteetan. Zenbateko hori urtean 3.000 eurokoa izango da 36 urtetik beherakoentzat, talentu gaztea erakartzea eta finkatzea errazteko.

Gazteen prestakuntza eta enplegua Bizkaiaren etorkizuna eraikitzeko

Lanbide-heziketa lurraldearen garapen ekonomiko eta sozialaren zutabeetako bat da. Foru Arauak etengabeko prestakuntzarako eta prestakuntza dualerako pizgarriak zabaltzen ditu, programa horietako kontratuei lotutako soldata-kostuen % 20ko kenkaria gehituz.

Era berean, neurri espezifikoak bultzatzen dira gazteak lan-merkatuan sartzen laguntzeko eta Bizkaian duten errotzea indartzeko, lanbide-heziketak kualifikazio handiko eta enpresen benetako beharrekin lerrokatutako enpleguak lortzeko duen funtsezko zeregina aitortuz.

Interes sozialeko etxebizitzen errentamendua

Etxebizitzarako eskubidea betetzearekin lotutako 2025eko zerga-berrikusketa fiskaleko neurrien osagarri gisa, fiskalitatea erabiliz lankidetza publiko-pribatuko eredu berritzailea bultzatzen da, etxebizitza-merkatuan sartzeko zailtasunak dituzten pertsonei interes sozialeko alokairua errazteko. Neurri zehatz gisa, % 15eko kenkari berri bat ezartzen da interes sozialeko etxebizitzen errentamendua sustatzera bideratutako funtsetako partaidetzak erosteko kontuetan gordailututako zenbatekoentzat, urtean 750 euroko kenkari-mugarekin.

Helburua aurrezki pribatua gizarte-inpaktua duten proiektuetara bideratzea da, eta etxebizitza irisgarrien eskaintza zabaltzea gazteentzat, lan-arrazoiengatik lekualdatutako pertsonentzat edo zaurgarritasun-egoeran dauden kolektiboentzat.

Ongizate fisikoa eta mentala lehentasun gisa

Foru Arauak ezartzen dituen berrikuntzen artean funtsezko kontua da langileen bizi-kalitatea. Neurri berriak sartzen dira ohitura osasungarriak, gaixotasunen prebentzioa eta ongizate fisiko eta emozionala sustatzeko. Aurreikusitako neurrien artean osasun-aseguruen primen gaineko % 20ko kenkaria dago, aseguratutako pertsona bakoitzeko 1.500 euroko gehieneko oinarriarekin, eta % 20ko kenkaria gimnasioetako eta kirol-jardueretako gastuetarako, 1.000 euroko gehieneko oinarriarekin.

Gainera, zerbitzu hauek enpresek zuzenean ematen dituztenean, ez dira gauzazko ordainsaritzat hartuko langileentzat, eta, horrela, zerbitzu horiek errazago eskuratu eta erabili ahal izango dira.

Berritutako ibilgailu-parkea duen Bizkaia

Zerga-berrikusketan energia-trantsizioa sustatzeko onartutako neurriak indartuz, % 5eko kenkaria ezartzen da ibilgailu berriak erosteagatik, hamar urtetik gorako antzinatasuna duten ibilgailuak txatar bihurtzen direnean.

Biktimekiko eta erreparazioarekiko konpromisoa

Foru arauaren aurreproiektuak izaera sozial nabarmena duten neurriak ere jasotzen ditu, haurtzaroan eta nerabezaroan jasandako sexu-abusuen biktimei aitorpena eta ordaina emateko. Horrela, elizan edo beste erakunde batzuetan jasandako kalte fisiko edo psikikoagatik adingabeei emandako kalte-ordainak salbuestea proposatzen da.

Jarduketa hauen helburua eragindako pertsonen erreparazio- eta aitorpen-prozesuak erraztea da, biktimak erakundeen erantzunaren erdigunean jarriz eta Bizkaiak haurren eskubideak babesteko eta egoera bereziki zaurgarriak jasan dituztenei arreta emateko duen konpromisoa indartuz.

Neurri-multzo honekin Bizkaiak jarduera ekonomikoaren sustraitzean, langileak erakarri eta babestean eta gizarte-ongizatean oinarritzen den bere estrategia integrala indartzen du.

Iturria: Bizkaiko Foru Aldundia