Errenta kanpaina apirilaren 3an hasi eta ekainaren 26an amaituko da Araban. Data horretatik aurrera, “rentafacil” proposamena eginda duten zergadunak Egoitza Elektronikoan sartu ahal izango dira, BAK, BAKQ edo baliozko beste edozein ziurtagiriren bidez identifikatuta, proposamena egiaztatzeko eta onartzeko edo, hala badagokio, aldatzeko. Aurreko urteetan bezala, proposamena aldatu egin daiteke alokatutako higiezinen etekinak, ohiko etxebizitzaren alokairuaren kenkaria eta banku helbideratzearen kontua gehituz. Aurten, berrikuntza gisa, etxebizitza kontuaren kenkaria eta dohaintzen kenkaria ere gehitu daitezke. Proposamen horien berrespenak 2023ko apirilaren 19tik ekainaren 18ra egin ahal izango dira Arabako Foru Aldundiaren egoitza elektronikotik kanpo.

Halaber, apirilaren 3tik aurrera, “rentared” modalitateko aitorpenak aurkeztu ahal izango dira; zergadunek Arabako Ogasunak egindako pertsona fisikoen errentaren gaineko zergaren laguntza programaren bidez egindako  eta Arabako Foru Aldundiaren Egoitza Elektronikotik bidalitako proposamenak dira.

Aitorpenak bidaltzeko, baliozkoak izango dira Izenpek emandako Bak eta Bakq identifikazio eta sinadura elektronikorako baliabideak, bai eta egoitza elektroniko horretan baliozkoa den beste edozein ziurtagiri digital ere. Era berean, apirilaren 3tik aurrera, aholkularitza edo kudeaketa bulegoek beren bezeroen errentaren eta ondarearen gaineko zergaren aitorpenak aurkeztu ahal izango dituzte “rent@raba” modalitatean.

Apirilaren 19an, errentaren gaineko zergaren aitorpenak aurrez aurre egiten hasiko dira Arabako Foru Ogasunaren bulegoetan (Gasteiz, Laudio eta Guardia), «rent@raba» modalitatean.

Doako zerbitzu hori zergadun guztiek eskuratu ahal izango dute, salbu eta 2022an jarduera ekonomiko batean aritu direnek, beren ohiko etxebizitza saldu dutenek, higiezinak edo akzioak saltzeko hiru eragiketa baino gehiago egin dutenek, merkataritza sozietateetako kotizatu gabeko partaidetzak saldu dutenek edo lekualdatutako langileentzako araubide bereziaren arabera tributatzea erabakitzen dutenek. Ordainketari dagokionez, ondarearen gaineko zergaren autolikidazioetatik ateratzen den zenbateko osoa 2023ko ekainaren 26rako sartu behar da. Pertsona fisikoen errentaren gaineko zergaren kasuan, autolikidazioa egin ondoren ateratzen den zenbateko osoa ekainaren 26a baino lehen sartu ahal izango da, edo ordainketa zatikatu. Azken kasu horretan, lehen ordainketa, guztizko zenbatekoaren % 60, 2023ko ekainaren 26rako egingo da, eta bigarren ordainketa, gainerako % 40a, 2023ko azaroaren 10erako.