Bizkaiko Batzar Nagusiek 6/2025 Foru Araua onetsi dute, zeinaren bidez Zerga Osagarri bat ezartzen den talde multinazional eta tamaina handiko talde nazionalentzat, gutxieneko tributazio globala (%15) bermatzeko helburuarekin. Neurri horren bidez, EBko 2022/2523 Zuzentaraua eta Ekonomia Itunaren azken aldaketak Bizkaiko zerga-araudira egokitzen dira.

Zerga hau 750 milioi eurotik gorako negozio-zifra kontsolidatua duten taldeei aplikatuko zaie, azken lau ekitaldietatik bitan gutxienez. Tributu zuzena eta pertsonala da, eta hiru modalitatetan egituratzen da: zerga osagarri nazionala, primarioa eta sekundarioa, errenten inklusioaren eta gutxiegi zergapetutako onuren arauen bidez.

Foru Arauak zehazten du zer entitate diren zergadun, zein kasutan jarduten duten ordezko gisa beste entitate batzuek, eta zein diren aplikaziotik kanpo geratzen diren entitateak, hala nola administrazio publikoak, irabazi-asmorik gabeko erakundeak, pentsio-funtsak edo nazioarteko erakundeak.

Halaber, zerga-oinarria kalkulatzeko irizpide zehatzak ezartzen dira, kontabilitate-emaitzatik abiatuta egin beharreko doikuntzak arautuz, eta kudeaketa- eta informazio-betebeharrak arautzen dira talde mailan.

Azkenik, Foru Arauak Sozietateen gaineko Zergan eta PFEZn hainbat aldaketa jasotzen ditu, besteak beste, aktibo jasangarrien amortizazio azkarrerako pizgarriak, garapen jasangarriarekin eta trantsizio energetikoarekin lotutako inbertsioei laguntzeko neurriak, eta zenbait doikuntza tekniko.

Testuinguru horretan, aipatzekoa da Gipuzkoak duela hilabete bat pauso berdina eman zuela OCDEren II. Zutabearen markoan, %15eko gutxieneko tributazio globala ezarriz talde nazional eta multinazional handientzat. Horri esker, Gipuzkoa EAEko lehen Lurralde Historikoa bihurtu zen, gutxieneko zergapetze globalaren sisteman bere araudia modu osoan integratuz. Bizkaiako eta Gipuzkoako esperientziek fiskalitate globalean eta zerga-autogobernuaren arloan urrats sendoak erakusten dituzte, eta euren araudia nazioarteko estandarrekin egokitzeko gaitasuna indartzen dute.