Eusko Jaurlaritzako Ogasun Sailaren datuen arabera, 2.540 milioi euro jaso dituzte ogasunek urtarriletik martxora bitarte, iaz tarte horretan baino %1,48 gutxiago.

Urtearen lehen erdian ekonomiak atzera egingo duela esan du Jaurlaritzak. Egun nagusi diren langabezi tasa altuek eta hauek kontsumoan duten eragin ezkorrak BEZaren bidez gutxiago biltzea ekarri dute: %10,7.

 Kontsumoaren jaitsiera zerga berezietan izan du isla: %13 jaitsi da alkoholaren gaineko zergaren bidez jasotakoa, %5,3 garagardoarena, %5,6 erregaiena. Tabakoaren gaineko tasak soilik eman du diru gehiago (%21,3), zerga hori igo egin zuelako Espainiako Gobernuak.
Herrialde batetik bestera aldaketa nabariak daude. Bizkaiak 1.585,6 milioi bildu ditu (-%0,2), 653,4 milioi Gipuzkoak (-%0,91) eta 301,7 milioi Arabak (-%6,96). 

Errenta zergak eman die aldundiei diru gehien: 1.221 milioi, iaz baino %0,8 gehiago. Bilakaera hobea eduki du beste zerga zuzen nagusiak, enpresek pagatzen duten sozietate zergak:%25,6 handitu da bilketa, eta 71 milioi jaso dituzte.
Iturria