2023ko errenta-kanpainako emaitza oso altuei eutsi zaie (9,03). Arreta pertsonalak —aurrez aurrekoa zein telefono bidezkoa— Bizkaiko Foru Aldundiko Ogasun Sailaren batez besteko balorazioaren gainetik jarraitzen du (9,3 eta 9,1 puntu, hurrenez hurren). Arreta telematikoak, berriz, 8,6ko nota eskuratu du, bikaintasunetik oso gertu.

Bizkaiko Foru Aldundiak egindako inkesten emaitzek berretsi dute 2024ko errenta-kanpainan emandako herritarren arretarako zerbitzuen kalitatea maila oso altuan kokatu dela. Guztira, 10.097 inkesta egin dira erabiltzaileen iritzia jasotzeko, eta ondorio nagusia argia da: zergadunek balorazio oso positiboa egin dute PFEZaren aitorpena egiteko eskura izan dituzten laguntza-zerbitzuez, eta gogobetetze-maila handia egonkortu da.

Zehazki, Bizkaiko Foru Ogasunak emandako arreta-zerbitzuen balorazio globala 10etik 9 puntukoa izan da. Horrenbestez, bigarren urtez jarraian, zerbitzu horiek bikain gisa kalifikatu dituzte erabiltzaileek, azken urteetako bilakaera positiboari jarraipena emanez.

Zerbitzuaren balorazioa erabilitako arreta-bidearen arabera aztertuta, emaitzek erakusten dute arreta telefonikoa eta aurrez aurrekoa direla oraindik ere baloraziorik handiena jasotzen duten kanalak. Telefono bidezko laguntza erabili duten zergadunek 9,11ko batez besteko nota eman diote zerbitzuari (2023an 9,25), eta aurrez aurreko arreta jaso dutenek, berriz, 9,27koa, aurreko kanpainako maila berdina mantenduz. Bide digitalen bidez artatutako pertsonek 8,62ko balorazioa egin dute, iazko datua (8,51) hobetuz.

Telefono bidezko arreta: erabiltzaileen % 95 pozik edo oso pozik

2023ko errenta-kanpainan lortutako emaitza bikainak berresten dira. Inkestatutako pertsonen % 77k adierazi dute erabat pozik geratu direla telefono bidezko arreta-zerbitzuarekin, eta beste % 18k nahiko pozik. Hortaz, hamar pertsonatik bederatzitik gora pozik edo oso pozik daude jasotako zerbitzuarekin, eta soilik % 5ek adierazi dute asebetetze txikiagoa. Datu horiek argi erakusten dute 2024ko errenta-kanpainan telefono bidezko arreta-zerbitzuak bikaintasun-maila lortu duela.

Inkesten arabera, erabiltzaileen % 95ek erraz aurkitu dute errenta-kanpainarako telefono-zenbakia. Egindako deien % 67 informazioa edo zalantzak argitzeko izan dira, eta % 32k PFEZaren aitorpena telefonoz aurkezteko erabili dute zerbitzua. Kasuen % 80tan, kontsulta edo kudeaketa dei berean konpondu da. Halaber, inkestatutako pertsonen % 94k gomendatuko luke zerbitzu hori beste pertsona batzuei. Datu horiek jasotzeko, 1.500 elkarrizketa telefoniko egin dira. Datu horiek biltzeko, 1.500 elkarrizketa egin dira telefonoz.

Aurrez aurreko arreta: erabiltzaileen % 98 pozik edo erabat pozik

Aurrez aurreko arreta jaso duten erabiltzaileen balorazioa oso altua izan da berriro ere. Foru Ogasunaren bulegoetara joan diren pertsonen ia % 87 erabat pozik geratu dira jasotako arretarekin, eta % 11 nahiko pozik. Gogobetetze-maila globala % 98koa da, 2023ko errenta-kanpainan lortutako emaitza berdina. Batez besteko balorazioa 9,3 puntukoa izan da, aurreko urteko maila bikainari eutsiz.

Hitzordua eskatzeko, telefonoa izan da gehien erabilitako bidea (% 61), bereziki 55 urtetik gorakoen artean. Gazteagoek, aldiz, internet gehiago erabili dute (% 34), aurreko urtearekin alderatuta sei puntu gehiago. Inkestatutako pertsonen % 96k adierazi dute hitzordua eskatzeko prozedura oso erraza izan dela, eta % 94k bisita bakarrean konpondu dutela kontsulta edo kudeaketa. Aurrez aurreko arretaren kasuen % 70 inguru zalantza fiskalei lotuta egon dira. Guztira, 2.000 elkarrizketa pertsonal egin dira Bizkaiko Foru Aldundiaren bulegoetan, eta erabiltzaileen % 98k zerbitzua gomendatuko luke.

Laguntza telematikoa: erabiltzaileen % 91 pozik edo oso pozik zerbitzuarekin

Arreta telematikoak ere hobekuntza nabarmena izan du 2024ko errenta-kanpainan. Zerbitzu horrekin pozik edo oso pozik daudenen ehunekoa % 91ra igo da, 2023ko kanpainarekin alderatuta lau puntu gehiago. Erabat pozik daudenen ehunekoa (% 67) ere handitu da. Batez besteko balorazioa 8,6 puntukoa izan da, aurreko urteko 8,5aren gainetik.

Kritika egin duten erabiltzaileen ehunekoa (% 4) ohikotzat jotzen da mota honetako zerbitzuetan. Iradokizun nagusia zerbitzu telematikoari buruzko informazioa hobetzea da, bereziki tutorial eta azalpenen bidez. Nolanahi ere, inkestatutako pertsonen % 45ek ez dute hobekuntzarik proposatu, jasotako arretarekin pozik daudela adieraziz. Guztira, 6.597 elkarrizketa egin dira online.

Hamar pertsonatik zortzik aurkezpen digitala aukeratu dute

2024ko errenta-kanpainan, zergadunek hiru bide izan dituzte aitorpena aurkezteko: digitala, telefono bidezkoa eta aurrez aurrekoa. Gehienek, alde handiz, bide digitala hautatu dute: aurkeztutako aitorpenen ia % 78. Telefonoz aurkeztutakoak % 16,63 izan dira, eta aurrez aurrekoak % 5,84. Datu horiek antzekoak dira 2023ko kanpainakoekin, eta agerian uzten dute herritarrek gero eta gehiago lehenesten dutela bide telematikoa, kanpaina osoan zehar eskaintzen duen malgutasunagatik. Horiez gain, Ogasunak automatikoki izapidetu ditu 27.237 aitorpen, zergadunek izapiderik egin beharrik gabe.

Guztira, Errenta 24 kanpainan 674.974 PFEZ aitorpen aurkeztu dira. Horietatik 498.431k itzultzeko emaitza izan dute, eta 598,7 milioi euro itzuli dira zergadunen alde. Gainerako 176.543 aitorpenek ordaintzeko emaitza izan dute, eta guztira 468,4 milioi euro sartu dira Ogasunean. Kanpainaren azken saldoa negatiboa izan da Bizkaiko Foru Ogasunarentzat, eta 30,3 milioi euro itzuli zaizkie zergadunei.

Iturria: https://bit.ly/4j5ufm8